Локалната инфраструктура во Општина Маврово и Ростуше продолжува да се модернизира со засилено темпо.
– Во тие рамки успешно заврши втората фаза од капиталниот проект за рехабилитација, проширување и асфалтирање на улица во село Скудриње, кој беше реализиран со финансиска поддршка од македонската Влада со кофинансирање на дел од средствата од буџетот на општина Маврово и Ростуше, информираа од општината.
По повод финализирањето на градежните активности, градоначалникот на општината, Онер Јакупоски, заедно со пратеникот Мевмед Џафери, извршија теренска посета на овој исклучително значаен инфраструктурен објект.
– Соработката помеѓу локалната самоуправа и централната власт дава конкретни и видливи резултати во интерес на граѓаните. Со проширувањето и комплетното асфалтирање на оваа улица во Скудриње, не само што го решаваме долгогодишниот проблем со пристапноста, туку и значително ја зголемуваме безбедноста во сообраќајот, изјави градоначалникот Јакупоски.
Пратеникот Џафери изрази задоволство од ефикасноста при реализацијата на проектот и потенцираше дека поддршката од Владата за Општина Маврово и Ростуше ќе продолжи и во иднина, со цел обезбедување рамномерен развој и подобри услови за живот во сите населени места.
– Новата патна инфраструктура во село Скудриње значително го олеснува секојдневието на жителите, а Општина Маврово и Ростуше уште еднаш ја потврдува својата посветеност кон исполнување на ветувањата за модерна и функционална општина, наведуваат од општината.
