Зошто министерката за финансии не ја продолжи помошта за исплата на плати, туку ја ограничува на април и мај? – прашуваат бизнисмените. Откако Управата за јавни приходи соопшти дека 20 илјади компании аплицирале за мерката исплата на 14.500 денари по работник или исто толку фирми колку што добија вкупна помош минатиот месец, се отвора дилемата дали фирмите имале уште поголеми финансиски проблеми во мај во однос на април? Процесот на поднесување барања трае до крајот на неделава.
Министерката за финансии во повеќе наврати посочи дека е задоволна што за април помош добија 20 илјади фирми за 127 илјади вработени и покрај тоа што се очекуваше да аплицираат 35 илјади компании за вкупно 250 илјади вработени.
Надлежните тогаш тврдеа дека малата бројка не значела проблем со преобемната документација, туку дека фирмите не биле во толку големи финансиски проблеми.
Бизнисот веќе некое време алармира дека никако не може да излезе од финансиската криза и дека мерките мора да се продолжат за уште најмалку два месеци, а ако има потреба и до крајот на годинава. Од Сојузот на стопански комори предупредија дека над 80% од фирмите претрпеле огромни штети и се сериозно засегнати од коронакризата. Од Организацијата на работодавачи пак излегоа со податоци дека најголем дел од нивните членки пријавиле штети од 20 до 50 % од приходите, а 8% веќе ги затвориле бизнисите.
Освен 20-те илјади апликации од фирмите за исплата на плати за мај, до УЈП пристигнале 4.700 барања од самостојните вршители на дејност и 2.200 барања за субвенционирање на придонеси.
Тања Попова
