Се соочувавме и со игнорирање и со инклузија, ние ја придвижуваме инклузијата затоа што никој нема да се сети за нашата инклузија, ако сами не го подигнеме гласот. Верувам дека процесот на инклузија и општество еднакво на сите ќе биде што е можно побрзо остварлив, истакна претседателот на „Мобилност – Македонија“, Бранимир Јовановски, на денешната јавна дебата на тема „Игнорирање и инклузија“ што се одржа во Битола.
Според првиот човек на Националниот сојуз на лица со телесен инвалидитет на Македонија, „Мобилност“, голем е спектарот на отворени проблеми и секоја активност што води кон подигнување на јавната свест е добредојдена.
-Процесот на инклузија и се што им се случува на лицата со инвалидност и попреченост во тој процес, можеби наизглед е лесен, но сепак е многу тежок и комплициран. Кога велиме инклузија, некој мисли дека на луѓето им се овозможила минимална можност да излезат на улица, притоа немислејќи дека вистинска инклузија значи дека лицата треба да имаат пристап до квалитетни ортопедски помагала, да имаат институции и училишта без бариери за да се едуцираат до највисоките лични можности. Голем е спектарот на отворени проблеми и секоја активност што води кон подигнување на јавната свест во оваа област е добредојдена. Верувам дека процесот на инклузија и општество еднакво на сите ќе биде што е можно побрзо остварлив- истакна Јовановски и додаде дека во минатото се соочувавме и со игнорирање и со инклузија. Ние ја придвижуваме инклузијата затоа што никој нема да се сети за нашата инклузија, ако сами не го подигнеме гласот.
На јавната дебата во Битола, м-р Биљана Тодоровска говореше за емпатијата која според неа е на нисоки ниво.
-Најголем дел од општата средба со луѓето како проблем според мене е емпатичноста. Пристапот на инвалидите скоро насекаде е отежнат, насекаде паркирани автомобили, ниско ниво на емпатија, на емоционална свесност и совесност. Општеството не е само за оние кои можат или кои се моќни, напротив општеството е за сите и за немоќните. Препорачувам вклучување на поголем дел од образованието, воведување наставен предмет за емпатија за да се подигне нивото на свесност кај децата, да се читаат книги бидејќи на тој начин се зголемува емпатијата – истакна Тодоровска.
За темата „Игнорирање и инклузија“ пред аудиториумот во Битола говореа и д-р Нико Јанков и м-р Василчо Илијев.
