Апокалиптични сцени на опустошени улици, изгорени автомобили и објекти, искршени излози и ограбени продавници, меѓу кои и оние на луксузните светски брендови… По тензичната ноќ, сликата од Париз, но и од Лимож, Лион, Марсеј и Бордо, сведочи за хаосот и насилствата кои траеја доцна во ноќта. Комуналните служби и пожарникарите го расчистуваат теренот и ги гаснат остатоците од опожарените и пеплосани автомобили, велосипеди, мопеди и контејнери.
Проценките се дека синоќа на улица имало помеѓу половина и еден милион луѓе. Францускиот премиер соопшти дека досега се уапсени над 1200 лица, а повредени се 150 полицајци. Официјално има и еден починат во болница откако му се слошило на протестите. Во Бордо полицијата со солзавец ги развбиваше демонстрантите, а во Лимож беше запалена и градската општина од 19 век.
„На оние кои сакаат да го искористат ова насилство како подготовка за претседателските избори им порачувам дека нема да нè заплашат. Никој нема да ја наметне својата политичка агенда со насилство“, изјави францускиот премиер Себастијан Лекорну.
Претседателот Макрон повика на единство и порача дека одговорните за насилството мора да се соочат со последиците.
„Сите ќе бидеме обединети против оние што шират хаос, чија единствена цел е да ги поткопаат нашите институции и да ги спречат луѓето мирно да ги изразуваат своите барања“, објави францускиот претседател, Емануел Макрон на платформата „Икс“.
Министерот за трговија најави помош за трговците чии објекти биле уништени или ограбени, а министерот за правда побара од обвинителствата одлучно да постапуваат против осомничените за насилство и грабежи, вклучително и со барања за притвор.
Градските власти во Париз и Марсеј ја критикуваа полициската реакција, оценувајќи дека немало доволно сили за да се спречат грабежите и уништувањето на имотот. Но, не гореше само во Франција. Протести и немири се случуваа и во другите европски земји, како Италија, Белгија и Португалија, каде што илјадници млади протестираа и се судрија со полицијата. Причина за протестите е растечкото незадоволство од високите цени и трошоците за живот.
