И покрај дождот, веќе трет ден гори на подрачјето меѓу селата Грачани и Никиштане во Општина Ѓорче Петров. Пожарот е активен од двете страни на границата – огнената линија се прошири и на територијата на Косово. Гори претежно сува трева, грмушки и ниски смреки, но нема опасност за околните населени места. Тешко пристапниот терен и силниот ветер го отежнуваат гаснењето, а утрово интервенцијата ја засилија два ер-трактори, како и полициски и армиски хеликоптер.
„Овој пожар пред три дена од косовска страна навлезе на македонска страна. Врз него, овие денови дејствуваме и од водузх и од земја, но за жал се уште е активен. Од воздух, поддршка дава еден армиски хеликоптер, еден полициски, како и два ер-трактори на ДЗС. Во овој момент, двете села Грачани и Никиштане не се загрозени од пожарот, иако кај населението постои одредена загриженост.“, изјави Стојанче Ангелов, директор на ДЗС.
Во изминатото деноноќие беа регистрирани два намерно подметнати пожари – еден на територијата на Општина Студеничани и еден кај Општина Зелениково. Евидентирани се вкупно 31 пожар, од кои 27 се по изгаснати. Под конрола се пожарите кај Градски парк, Скопје каде гореше сува трева, ниската вегетација и ѓубре во Општина Бутел, улица „Боца Иванова“ како и дивата депонија во Визбегово.
„Ваквото палење на разни пожари низ територијата на градот Скопје ги расфрла нашите сили и пожарникарите не можеме да ги сконцентрираме кај големиот пожар кој од косовска страна навлезе кон македонска страна. Затоа апелирам до граѓаните, да бидат исклучитено внимателни со своето однесување да не предизвикаат пожар“, вели Ангелов.
Пожарот кај Грачани останува активен, а интервенцијата продолжува од копно и од воздух. Високите температури и сувото време создаваат услови пожарите лесно да се прошират. Надлежните повторно апелираат до граѓаните да не палат оган на отворено место и да не создаваат диви депонии.