Нови маки за скопјани на почетокот на учебната година. Приватните превозници во понеделник ќе ги остават автобусите во гаражите, односно ќе возат само на една линија по еден автобус и тоа по еднаш во денот, наутро или навечер.
Граѓаните и сега со часови чекаат автобус на постојките. Со месеци наназад, пристигнувањето од точка „А“ до точка „Б“ во главниот град е сериозен предизвик – автобусите никако да стигнат на време како што е најавено со возниот ред, а и кога ќе го дочекате – се преполни и неклиматизирани. Може само да се претпостави каков сообраќаен колапс ќе се случи во понеделник кога ќе недостигаат околу 150 автобуси според зимскиот возен ред, а децата ќе мора да стигнат во школо.
Приватните превозници велат дека се приморани на ваквата одлука затоа што од ЈСП не добија позитивен одговор за исплата на нивниот долг кој бил превисок, а нема ниту збор за покачување на цената по километар.
На секоја линија да има по еден автобус да сврти еден круг и да се врати назад. Оваа одлука моравме да ја донесеме како приватни превозници бидејќо имаме преголем долг премногу месеци и не можеме да издржиме да ги плаќаме шоферите, ни нафта ни сите други трошоци, вели Петрушевски – приватен превозник .
Во понеделник во 11 часот треба да се сретнат со претставници на ЈСП, по што ќе донесат одлука за чекорите понатаму. Тие информираат дека на дневна основа ќе известуваат дали ќе возат наредниот ден.
Приватните превозници посочуваат дека од јуни чекаат да им биде исполнето ветувањето за прилагдодување на цената по километар со оглед на повисоките трошоци, но засега нема ништо од тоа.
Не само тоа имаме и друг проблем.. Требаше да се направи оптимизиација на цената по километар, бидејќи сите други трошоци се зголемени, но досега не се случи тоа но останавме на едно ветување ќе биде ќе биде и затоа ќе мора да застанаме, затоа што ние не возиме јуни и нема ништо. Нашите одлуки ќе бидат секој ден, вели Петрушевски.
Од друга страна од ЈСП и нема некои подетални информации за тоа како ќе функционира главниот град во понеделник, на ова прашање директорот Драги Кушовски само кратко ни одговори дека правеле се што можеле
Правиме максимални напори во рамките на нашите можности, одговори кратко Кушовски.
На седницата на Град Скопје во четвртокот не помина одлуката за набавка на 250 еко автобуси. Мнозинството од Советот не изгласа, а претседателот Трајко Славевски образложи дека ниту со Ребалансот на Буџетот на Град Скопје не биле предвидени пари за тоа. Откако не помина одлуката, Кушовски кажа дека ќе се обиде да се поправат 40 автобуси кои би биле пуштени во сообраќај, но засега нема информација дали воопшто се поправаат автобусите и дали би биле на скопските улици во понеделник.
