На Македонија и е потребен трет мобилен оператор што ќе ги намали цените. Граѓаните велат дека иако се задоволни од услугите на веќе постоечките мобилни оператори во Македонија, според нив сепак цените се многу високи и од новата конкуренција очекуваат да влезе на пазарот со нови понуди и поевтини пакети.
“Па се надеваме дека цените ќе ги намалат, тоа е најважно за нас. Од услугите сме задоволни од досегашните оператори ама цените нормално, што се пониски тоа се подобри.. Кога ќе има уште еден оператор мислам дека ќе биде подобро, очекуваме цените да се намалат барем 30 проценти.”- изјавија граѓаните.
Споредбено со земјите од регионот, во моментов само Макдонија и Албанија имаат по два оператора. Она што е позитивно е најавата дека кај нас сепак влегува нова конкуренција, која треба да донесе подобрување на услугите и намалување на цените. Процедурите се во тек за граѓаните од следната година конечно да можат да ги користат услугите на новиот мобилен оператор. На 22 август ќе се отворат понудите и ќе се знае кој се пријавил на тендерот на АЕК, а ова лето треба компанијата да биде избрана и да добие лиценца.
“ Одлуката за избор на понудувачи кои ќе учествуваат во постапката на јавно наддавање ќе се донесе во рок од 10 дена од денот на јавното отворање на понудите.Во одлуката ќе се утврди местото и времето на одржување на јавното наддавање кои што нема да биде пократко од 14 дена и подолго од 30 дена од денот на донесување на одлуката” – се вели во објавата на Службен весник на Македонија.
Дека е потребен нов оператор на пазарот потенцираше и вицепремиерот и министер за транспорт Александар Николоски. Според него постоечките оператори не нудат добри и поволни услуги за граѓаните. Со влезот на нов оператор ќе се постигнат повеќе бенефити, државата ќе добие пари бидејќи лиценците се плаќаат, а ќе има нови инвестиции во телекомуникациската мрежа.
