Градоначалникот на Скопје, Орце Ѓорѓиевски, оствари средба со вршителката на должноста шеф на мисијата во Амбасадата на Соединети Американски Држави во земјава, Никол Варнс.
Како што информираше градоначалникот на својата Фејсбук-страница, на средбата ѝ посакал успешен мандат и изразил подготвеност за продолжување и продлабочување на досегашната соработка со САД, особено во областите од суштинско значење за нашето општество, како борбата против корупцијата на сите нивоа, унапредувањето на демократските процеси и јакнењето на учеството на граѓаните во носењето одлуки во локалната самоуправа.
– Во разговорот ги презентирав главните проекти на кои интензивно работи Град Скопје во изминатите три месеци. Посебен акцент беше ставен на унапредувањето на сообраќајната инфраструктура, подобрувањето на јавната хигиена, создавањето нови зелени површини и отворањето простор за поголемо вклучување на младите во општествениот живот и процесите на одлучување. Верувам дека токму овие политики ја градат основата на едно модерно, функционално и одговорно урбано управување, напиша градоначалникот.
Ѓорѓиевски соопшти дека се разговарало и за можностите за продлабочување на соработката меѓу збратимените градови Скопје – Темпи и Скопје – Питсбург, преку иницирање програми за студиски престој на средношколци и уметници.
– Таквите размени претставуваат мост на пријателство, преку кој младите ќе имаат можност да се запознаат со културата и специфичностите на животот во збратимениот град, но и достојно да ја претстават сопствената култура преку своето творештво, нагласи градоначалникот.
Тој додаде дека убеден е оти токму ваквите иницијативи придонесуваат за трајно зближување на народите, засновано врз взаемна почит и разбирање.
– На денешната средба уште еднаш беше потврдена долгогодишната и принципиелна поддршка на САД како наш стратешки партнер, како и подготвеноста за реализација на идни заеднички проекти насочени кон унапредување на квалитетот на живот на граѓаните на Скопје. Остануваме посветени на градење партнерства што носат конкретни резултати и создаваат подобра иднина за нашите сограѓани, истакна градоначалникот.
