Изградбата на автопатиштата, локалните патишта, реконструкцијата на пругите и инвестициите во останатите инфраструктурни објекти се главниот двигател на македонската економија во досегашниот период. Градежништвото како гранка влече поголем број сектори, со што придонесува за обезбедување на долгорочен раст на македонската економија. Вицепремиерот и министер за транспорт Александар Николоски вели дека тие остануваат максимално посветени во овој сектор, бидејќи на таков начин се очекува и дополнителен мотив за придвижување на македонската економија кон остварување на нови рекордни, според него, стапки на раст.
„Се работи за исклучително висок раст и раст којшто не е феномен само за вториот квартал, второто тромесечје на оваа година, туку е континуитет уште од минатата година. Ние во 2024 година ги поставивме темелите, базата, ги поставивме проектите и веќе од 2025 гледаме силен раст во делот на градежништвото. Секој квартал е далеку, далеку над она што било просек претходно. Ова е историски највисок квартал, највисоко тромесечје. Вкупно завршени работи се околу 242 милиони евра за само три месеци. Споредено со истиот период минатата година, растот е околу 22%, а и минатата година имаше раст.“, изјави Николоски.
Покрај градбата на инфраструктурата, забележано во периодот кој измина беа и активностите во високоградбата, со што градежниот сектор во целост е ангажиран. Во моментов се гради автопатот кон Блаце, се градат автопатиштата од коридорите 8 и 10д, со што Македонија целосно се поврзува со автопати со сите соседи. Со изградбата на брзата железница, Македонија станува центар на патниот транспорт во Европа.
