Претседателот на ЗЕЛС и градоначалник на Општина Кисела Вода, Орце Ѓорѓиевски, изјави дека трагедијата не требаше да биде услов за започнување на вонредни инспекции, бидејќи редовните проверки се спроведуваат годишно. Тој увери дека јавните установи се безбедни, а на локациите со аномалии ќе следи итно постапување. Ѓорѓиевски исто така предложи законски измени кои ќе обезбедат редовни инспекции како обврска, најмалку еднаш или двапати годишно, наместо да зависат од индивидуалната одговорност на градоначалниците или инспекциите.
Ѓорѓиевски нагласи дека редовните инспекции се реализираат секоја година, а во општина Кисела Вода сите потребни проверки се спроведени согласно утврдената пракса.
„Дали требаше да се случи оваа трагедија за да започнеме со вонредни инспекции? Често го поставувам тоа прашање и имам документација која го потврдува тоа, особено за мојата општина, со редовните проверки што ги правиме секоја година“, изјави Ѓорѓиевски.
Тој додаде дека, иако повеќето општини редовно спроведуваат инспекции, постојат исклучоци. Сепак, поради актуелната ситуација, започнат е процес на вонредни инспекции, со фокус на јавните објекти, што е оправдано поради паниката што се создаде кај граѓаните, особено во однос на безбедноста на децата.
„Ретко се случува да нема редовни контроли во општините. Иако некои општини не ги спровеле инспекциите во минатото, сега сме во процес на вонредни проверки, со акцент на јавните објекти, бидејќи логично е да се создаде паника кај граѓаните. Не секој ќе биде спокоен да го испрати своето дете во училиште, градинка или друг јавен објект“, рече Ѓорѓиевски.
Ѓорѓиевски увери дека сите јавни објекти веќе биле подложени на инспекции и побарал записници од градоначалниците за извршените проверки. Тој нагласи дека граѓаните не треба да се грижат за безбедноста во јавните установи и дека ќе се преземат итни мерки на локациите со утврдени аномалии.
„Сите јавни објекти веќе се инспектирани. Од градоначалниците побаравме записници за извршените проверки и утврдената состојба. Граѓаните можат да бидат сигурни дека нивните деца учат во безбедни јавни установи. На локациите каде што ќе се утврдат аномалии, ќе следи итно постапување“, рече Ѓорѓиевски.
Тој ја нагласи потребата од законски измени кои ќе обезбедат редовни инспекции во јавните установи, наместо да зависат од индивидуалната одговорност на градоначалниците. Според него, ваквите проверки треба да се вршат најмалку еднаш или двапати годишно.
„Ние треба да се фокусираме на тоа да се направат законски измени, така што редовните инспекции ќе бидат обврска, а не само индивидуална одговорност на градоначалниците. Тие проверки треба да се спроведуваат најмалку еднаш годишно или двапати во годината“, заклучи Ѓорѓиевски.
