Градската каса ќе се креира по мерка на граѓаните. Градоначалникот на Скопје, Ѓеорѓиевски, упати јавен повик до сите житечи на метрополата, јавниот сектор и бизнис заедницата активно да се вклучат со свои предлози, идеи или забелешки во модернизирањето и развојот на главниот град. Транспарентноста и отчетноста ќе бидат водечки принципи според кои ќе се води таткото на градот.
„Годинава го отвораме процесот на планирање на буџетот за 2026 година заедно со вас – жителите на Скопје, невладиниот сектор, бизнис заедницата и сите кои сакаат да придонесат за поуредено и пофункционално Скопје. Ова е моментот кога секој може да влијае со конкретна идеја, предлог или забелешка. Верувам дека токму со ова отворено партнерство ќе создадеме стабилна основа за долгорочен развој и силно, достоинствено Скопје“, изјави Орце Ѓорѓиевски, градоначалник на град Скопје.
Од Град Скопје велат дека буџетот ќе се темели на реалните потреби на граѓаните и ќе биде со визија за модерно и функционално Скопје. Со новиот буџет треба да се обезбедат средства за почнување на нови проекти, но и откочување на некои што се заглавени со години. Пари ќе има за приоритетните капитални проекти кои Градот веќе ги најави, како што е клучката кај Момин поток, за решавање на сообраќајниот хаос во тој дел од метрополата, но и пуштање во функција на двата нови моста на реката Вардар, едниот во Карпош и другиот меѓу Аеродром и Гази Баба. Ќе бидат обезбедени средства за модерна инфраструктура, култура, спорт, зелени површини и проекти за подобрување на квалитетот на животот.
Досега се собрани голем број конструктивни предлози, но процесот останува целосно отворен и за нови идеи. Откако ја презеде градската фотелја од Арсовска, Ѓорѓиевски објави дека вкупниот долг на градот надминува над 300 милиони евра, но нагласи дека со добра организација и домаќинско работење може да изгради метропола со која сите скопјани ќе се гордеат. Буџетот за 2025 година изнесуваше 140 милиони евра, а колку ќе тежи новиот допрва ќе се знае.
