Голем интерес за финансирање на брзата пруга долж Коридорот 10. 16 меѓународни финансиски институции и комерцијални банки се заинтересирани да учествуваат во изиградбата на мегапроектот за брза железница – објави Министерството за финансии. Од таму потврдуваат дека во наредните недели ќе се анализираат и евалуираат понудите. Конечниот избор на кредитор се очекува до есен. Писмо беше доставено до 24 финансиски институции, а рокот за доставување на понудите истече на 7 јули. Проектот е еден од најголемите во транспортната инфраструктура во историјата на земјава, со проценета вредност од 1,91 милијарда евра, и предвидува модерна, брза железничка врска што ќе ја поврзе Македонија со регионот и пошироко со ЕУ.
“Ова е јасен сигнал дека сме на добар пат. Ваквиот одѕив покажува дека проектот е препознаен како реален, стратегиски и исплатлив за меѓународната финасика заедница. Во наредниот период ќе спроведеме детална анализа и евалуација на пристигнатите понуди. Наша цел е да се избере најдобрата структура за финансирање, која ќе ги задоволува критериумите за ефикасност, одржливост и заемна корист“, велат од Министерството за финансии.
Барањето до меѓународните финансиски институции беше испратено врз основа на заклучок на Владата, а, покрај писмото, било доставено и детално образложение за проектот, изготвено од Министерството за транспорт и врски и МЖ Инфраструктура.
Откако ќе се изгради оваа железница од Табановце до Гевгелија, времето за патување драстично ќе се скрати. Патничките возови ќе сообраќаат со 200 километри на час, а товарните до 120.
Според експертите, изградбата на брза пруга долж Коридорот 10 ќе ја поттикне економската и трговската размена. Тие гледаат можност и за бенефит во делот на турзимот.
