Скопскиот градоначалник Орце Ѓорѓиевски, денеска изврши увид во почетокот на градежните активности за целосна реконструкција на крак „38“ на улицата „Македонско-косовска бригада“ во Шуто Оризари, соопштија попладнево од Град Скопје.
– Кога ја барав поддршка од граѓаните, тука ме пречекаа како што умеат вистински домаќини – со кафе, чај и со отворена врата. Ми кажаа дека ретко кој дотогаш дошол во ова маало да ги праша што им е најпотребно. А доволно беше да излеземе пред портите за да видиме зошто оваа улица беше првото и најважно барање. Со децении чекале некој да ја реконструира. Тој ден дадов збор. Денес, механизацијата е на терен и работата започна. Целосно го реконструираме крак „38“. По целата должина на улицата ќе поставиме нов асфалт, за семејствата од ова маало конечно да добијат уредена улица каква што одамна заслужуваат – наведува Ѓорѓиевски во соопштението.
Тој истакнал дека негова обврска како градоначалник е да обезбедува услови достојни за секој жител на Скопје, со темелна работа во секоја општина, за рамномерно да се развива целиот град.

