Успешно заврши првиот ден од еколошката акција „Генералка викенд“ во Штип. Вработените во штипските јавни претпријатија, општината, учениците и вработените во Универзитетот „ Гоце Делчев“ –Штип денеска се вклучија во најголемата еколошка акција, чистејќи ги дворовите и околината околу објектите. Во Штип „Генералка викенд“ ќе продолжи и утре, најави секретарот на општина Штип, Вишна Шорова-Ангелова.
-На 9 мај 2026 година (сабота), со почеток во 10:00 часот, ќе се реализира големата еко акција „Генералка“ на територијата на Општина Штип, на локација во непосредна близина на Мирјанина црква и патот кон Шашаварлија. Во еко акцијата ќе бидат вклучени припадници на АРМ, вработени во МВР, јавните претпријатија и Локалната самоуправа, приватни општествено одговорни компании, велосипедисти, извидници, како и голем број граѓани и волонтери-рече Шорова-Ангелова.
Градоначалниците на општините Пробиштип, Свети Николе и Карбинци информираа дека еко акцијата денеска е реализирана и кај нив.
-Генералка викенд” имаше на повеќе локации низ општина Карбинци. Заеднички со училиштата, општинската администрација и ЈП „Плачковица“ ја реализиравме денешната акција. Собрани се поголеми количини на отпад и расчистени се поголем дел од централните јавни површини. Да бидеме совесни, да не загадуваме-вели Виктор Паунов градоначалник на општина Карбинци.
