35 години – кризи, неизвесност, падови и тешки моменти но, Македонија опстана.Од распадот на Југославија, преку политички и економски кризи, до тешките години што ги поминаа граѓаните – изминатите три и пол децении не беа лесни – порача претседателот на Собранието Африм Гаши на приемот во законадвниот дом по повод 8 Септември. Државата помина низ бројни предизвици, но ниту една криза не успеала да ја скрши. Напротив – според Гаши, сите овие тешки моменти ја направиле Македонија поотпорна и посилна.
“Додека славиме, не треба да заборавиме дека патот во изминатите 35 години не бил лесен. Имаше периоди на успех, но и периоди на кризи. Имаше моменти на стабилност, но и моменти на политички и економски потреси. Доживеавме уставни и институционални промени. Поминавме низ тежок економски транзициски процес и трансформација на општеството, додека многу наши граѓани ја напуштија земјата во потрага по подобар живот.Сепак, ние, кои останавме овде, верувавме дека вреди да се обидуваме за ефикасни и доверливи институции. Затоа, и оваа 35-годишнина треба да ја гледаме низ она што сме го изградиле, а не низ она што не ни успеало. Ова е оптимистичката визија за земјата и за сите наши граѓани” изјави Африм Гаши, претседател на Собрание.
Собранискиот спикер Гаши ја поврзува иднината на државата и со дијаспората – не само како извор на пари, туку како потенцијал за знаење, инвестиции и искуство.Тој повика на држава со силни институции, еднакви правила за сите и поголема доверба на граѓаните во системот.
“Еден од столбовите на успешна држава, каква што посакуваме да биде и Македонија, е економскиот развој.Ние треба да создадеме услови младите да не го гледаат заминувањето од земјата како единствена можност за подобар живот. Тоа бара подобри работни места, бара квалитетно образование, бара инвестиции, бара модерна инфраструктура, бара технологија и иновации, бара поддршка за претприемништвото и бара администрација која го олеснува сето тоа.Затоа, треба да изградиме механизми кои ќе го олеснат враќањето на знаењето и инвестициите на иселеништвото во родното место” изјави Гаши.
Демографијата и иселувањето на младите беа меѓу главните пораки на претседателот Гаши.Тој порача дека не можеме да градиме силна држава ако секоја година губиме дел од младата генерација.Според него, решението не е само во тоа да се зборува за поголем наталитет. Младите мора да имаат причина да останат, а тоа значи работа, пристојни плати, квалитетно образование и здравство,сигурност,правда, подобра животна средина и можност за сопствен дом.
