Европската комисија постапила незаконски кога одбила да ги објави текстуалните пораки што претседателката Урсула фон дер Лајен ги разменувала со директорот на „Фајзер“ Алекс Бурла во врска со купувањето вакцини за ковид, пресуди Врховниот суд на ЕУ. „Комисијата не може да тврди дека не ги поседува документите што ги побарале новинарите без да даде веродостојни објаснувања кои ќе ѝ овозможат на јавноста да разбере зошто тие документи не може да се пронајдат“, наведува судот.
„Њујорк тајмс“, кој ја покрена тужбата, поднел релевантни и доследни докази што укажуваат на постоење на текстуални пораки помеѓу претседателката на Комисијата и генералниот директор на „Фајзер“ во врска со набавката на вакцини. Весникот дознал за пораките во 2021 година при интервју со првиот човек на „Фајзер“. Кога и биле побарани документите, Европската комисија одговорила дека не е во состојба да ги обезбеди.
Пресудата е сериозен политички удар за Урсула фон дер Лајен, која и порано беше критикувана дека ја задушува транспарентноста на Европската комисија.
