Денес и утре, 26 и 27 мај, Валандово ќе биде центарот на македонската песна со 39. издание на „Фолк Фест Валандово“.
Вечерва, 26 мај, на плоштадот во Валандово, со почеток во 20.30 часот, ќе се одржи претфестивалска вечер посветена на најголемите валандовски хитови, музичката носталгија и песните што со години живеат меѓу публиката.
На сцената ќе настапат Блага Петреска, Елена Велевска, Кате Соната, Христијан Божинов – Кико, Мишко Крстевски и Марјан Коцев, а вечерта ќе заврши со мини концерт на Влатко Миладиноски.
Претфестивалската програма ќе биде реализирана како ревијално музичко шоу, во кое песните ќе се надоврзуваат низ солистички настапи, дуети и заеднички изведби. Публиката ќе има можност да ги слушне и да ги отпее најпознатите валандовски хитови, меѓу кои „Лична Валандовчанка“, „Каде сте Македончиња“, „Бабино девојче“, „Доме мој“, „Срце бакшиш“, „Пеам да не заплачам“, „Жал за Деспина“, „Ако одам во Битола“ и антологиската „Бисер балкански“.
За музичката придружба ќе се погрижи оркестарот од емисијата „Мерак меана“ на Сител телевизија.
Големата фестивалска вечер ќе се одржи утре, 27 мај, во салата „Јанко Узунов“, со почеток во 20.30 часот. Пред публиката ќе бидат изведени 20 нови композиции, под диригентската палка на проф. д-р Илчо Јованов.
Фестивалската вечер ќе се емитува во живо на МТВ 1.
Влезот за претфестивалската вечер на плоштадот е слободен.
Валандово и оваа година останува градот на песната, а „Фолк Фест Валандово“ уште еднаш ќе ја обедини публиката околу македонската музика и традиција.
