Во Владата заврши средбата меѓу премиерот Христијан Мицкоски и лидерот на опозицијата, Венко Филипче.
По состанокот, Филипче изјави дека разговорот бил конструктивен и дека се договориле да формираат работни групи кои ќе работат на реформите во правосудството, енергетиката и здравството.
„Имавме навистина конструктивен состанок. Договоривме да формираме работни тела за спроведување на реформската агенда, која ќе вклучува закони во правосудството, енергетиката, како и стратешките движења во здравството. Ова беше почетен состанок, да видиме каква ќе биде методологијата“, изјави Филипче.
Тој додаде дека не е договорена следна средба, но дека ќе бидат делегирани стручни лица од области како енергетика и правосудство. Очекува сите политички партии да се вклучат во дискусијата за овие теми.
„Разговаравме за Евроинтеграциите, имаме различни позиции, а за ова ќе продолжиме да разговараме“, рече Филипче.
Според него, следниот логичен чекор е лидерска средба, но не соопшти кога точно ќе се одржи следната средба со премиерот.
