ЕУ воведува нов електронски систем за влез во Унијата кој ќе важи и за Македонија. Станува збор за нов дигитален систем за управување со границите за кој е усвоен привремен договор од страна на Советот на Европската унија и Европскиот парламент.
Наместо печати во пасош при влез и излез, системот дигитално ќе ги евидентира податоците од пасошот, отпечатоците од прсти и фотографиите на лицето на граѓаните на земјите надвор од ЕУ кои патуваат за краток престој во една од 29-те европски земји. Овој систем ќе се применува и за македонските граѓани при преминување на границите на ЕУ.
Системот автоматски ќе го пресметува времетраењето на дозволениот престој (максимум 90 дена во рок од 180 дена) и ќе испраќа предупредувања до земјите членки кога некое лице го надминува дозволениот период.
Конкретен датум за почеток на новиот систем сè уште не е одреден. За тоа, според соопштението од ЕУ, е потребна посебна одлука на Европската комисија. Договорот што сега е постигнат треба формално да биде потврден од Советот на ЕУ и Европскиот парламент.
