🎥 Ескалираат проблемите: Без вода Детската клиника „Козле“ и високите зони од населба Водно

Детската болница Козле остана без капка вода. Притисокот бил многу слаб неколку денови, а од утрото чешмите целосно се суви. Не станува збор за дефект со водоводната мрежа, бидејќи со ваков проблем последниот период се соочуваат жителите од повисокиот предел на Скопје.

Директорката на болницата во изјава за Алфа вели дека веднаш побарале техничка вода, а и донации за да има вода за пиење за хоспитализираните пациенти.

• „Болницата функционира, од Водовод ни обезбедија техничка вода со цистерни, така вода има цело време. Апаратите за анализа работат, единствено не работи лабораторијата за венска крв бидејќи за тоа е потребно вода. Вода за пиење ќе набави и болницата, побаравме и донации“, вели Бошкова.

Проблемот кој тлее од почетокот на топлиот бран ескалираше денеска кога без вода останаа поголем дел од визоките зони во градот. Најркитично е во населбите Водно и Пржино.

Изминатиот период одржаа и неколку протести бидејќи принудени се да чекаат до 3 часот по полноќ кога им се качува притисокот, поради намалената потрошувачка, за да вклучат машина за перење, да измијат садови и да се  искапат. Во повеќе наврати повикаа надлежните да им се обезбеди вода, но „Водовод“ наместо да понудат решение го повотруваат истиот одговор – потрошувачката била многу голема.

• „Во моментов, градскиот водоводен систем функционира со намален притисок со повремени прекини на вода на некои улици. Дивите приклучоци секако дека имаат негативно влијание на состојбата на системот и водоснабдувањето, но за таа цел се организираат акции за нивно откривање“, велат од „Водовод“.

Истиот одговор и го кажале и на директорката на болницата Козле која се надева дека најбрзо ќе надмине проблемот.

• „Од Водовод, како што кажаа и јавно, е поради намален притисок, намален притисок, високи температури, голема потрошувачка, резервоарите се скоро испразнети, заради тоа нема вода. Се работи на санирање на проблемот, до кога не знаат ни тие точно да ни кажат“ рече Катерина Бошкова – Директорката на болница „Козле“.

За министерот за локална самоуправа Златко Перински недостатокот на вода е кулминација на сите наталожени проблеми во Градот и во јавните претпријатија.

• „Од она што јас го имам како информација, станува збор за технички проблем и мислам дека тоа многу соодветно ќе ви го потврди и самиот менаџмент на Јавното комунално претпријатие „Водовод и канализација“ – Скопје. Но, она што е уште поинтересно, еве упатувам и еден апел до вас до новинарите, да видите каде се најголемите инвестиции, коишто Градот Скопје и Јавните комунални претпријатија ги имаат направено во изминатите, би рекол три години, и многу брзо ќе ви стане јасен одговорот зошто во моментов ги имаме овие технички проблеми – рече Перински.

Од кога почна високите температури, од Водовод апелираат рационално да се користи водата, но како ќе се надмине слабиот притисок кој ги остава дел од скопјани без вода не кажуваат. Велат дека потрушувачката оваа година е зголема од 15 до 20 проценти во спроредба со лани, но во нивните дописи нема најави за рестрикции за граѓаните барем да може да планираат.