Потребни се гаранции дека во иднина патот на Македонија кон ЕУ нема да биде попречуван од билатерални спорови, а евроинтграциите ќе се засноваат на заслуги и копенхашки критериуми – децидни се експертите. Пораките од конститутивната седница на интерпарламентарната група за следење на имплементација на обврските од Берлинскиот процес и реформската агенда се дека потребно е поголемо зајакнување на односите помеѓу земјите аспиранти и земјите членки на ЕУ.
Марко Трошановски од Институтот за демократија Социетас Цивилис порача дека реформите се клучни, но исто така очекува да се зголемува поддршката од страна на клучните играчи во ЕУ, дека по спроведување на обврските во однос на билатералните спорови, нема да има други условувања.
На денешната седница, за претседавач со парламентарната група беше избран пратеникот од ВМРО-ДПМНЕ, Антонијо Милошоски. Трошановски смета дека ова е само прв чекор, откога парламентите земаа поклучна улога во овој процес. Tој смета дека што се однесува до реформите на јавната администрација, има застој – бидејќи законите не се уште усвоени. Tрошановски го истакна и застојот во реформите во судството.
Берлинскиот процес започна во 2014 година како платформа за зголемена соработка меѓу шесте земји од Западен Балкан и ЕУ. Тој требаше да го отвори патот за влез на земјите од Западен Балкан во Унијата..
