Додека Владата се фали дека се отвораат нови работни места, бројот на работници во индустријата паѓа. Во јануари, во овој сектор работеле за 3,2% помалку работници споредено со истиот месец лани. Во услови кога престана да работи една од најстарите текстилни фабрики во земјава „Тетекс“, а голем број на граѓани сериозно размислуваат за преселба откако Германија ги олесни условите за работа, од Владата уверуваат дека ова бил краткотраен тренд. Министерката за финансии смета дека е добро тоа што индустријата како сектор има се поголемо учество во вкупното производство.
Невработеноста пак, лани, се намали на 16,6%, додека економијата порасна за 3,6%, што ги надмина владините проекции. Најголем придонес кон растот имале бруто инвестициите од 6,6%. Лани многу била зголемена и јавната потрошувачка за 4,5%, што е многу повеќе отколку во 2018-та. Кај домаќинставата се забележува стабилен раст на трошењата од 3,5%, додека увозот за првпат во последниве неколку години растел со поголема динамика од извозот со 9, наспроти 8,3 отсто.
Во владата се задоволни од бројките. Сепак, 2020-та почна со лоша реализација на капиталните инвестиции односно 1,67% од вкупно планираното за цела година. Ангеловска е задоволна од полнењето на буџетот во јануари и покрај тоа што за разлика од ДДВ, глобите, таксите и придонесите има ниска наплата на данокот на добивка.
Владата лани го скрои буџетот за годинава врз основа на проекции за економски раст од 3,8%. Тогашниот премиер Зоран Заев беше оптимист дека стопанството има сили и за раст од 4%. Предизборно на крајот на 2016-та ветуваше 5% економски раст, минималец од 16 илјади денари и просечна плата од 500 евра до крајот на мандатот годинава.
Тања Попова
