Египќаните, ужаснати од сцените на глад во Газа, започнаа иницијатива наречена „Од море до море – шише надеж за Газа“.
Како дел од иницијативата, тие полнат шишиња од еден и два литра со житарки, ориз, леќа и друга сува храна и ги фрлаат во Средоземното Море, со надеж дека ќе стигнат до брегот на Газа.
Учесниците велат дека ова е очајна мерка за надминување на израелската опсада, поради која камионите со хуманитарна помош се блокирани на граничните премини, додека стотици илјади луѓе гладуваат.
Тие ги повикаа и граѓаните на другите медитерански земји – како Либија, Тунис, Алжир и Мароко – да се приклучат на акцијата.
Идејата ѝ се припишува на египетски академик и инженер што живее во Јапонија. Во објава на Фејсбук, тој објаснил дека, според неговите пресметки, шишињата со храна би можеле да стигнат до бреговите на Газа за 72 до 96 часа.
