Ниту еден наставник нема да остане без работа со воведувањето на едносменската настава. Ова го потврди министерката Јаневска, која објасни дека дел од кадарот ќе биде прераспределен во училиштата и општините, каде има вишок на деца, а процесот ќе го спроведе Министерството за образование заедно со локалната самоуправа и менаџерите на училиштата.
„Дистрибуцијата на наставници во училиштата во Македонија е нерамномерна и во некои училишта постојат паралелки од по 12, 10, 15 деца и повеќе такви паралелки за да се зачуваат работните места на наставници кои што во овој момент би биле вишок ако се спојат паралелките“, изјави министерката за образование, Весна Јаневска.
Досега во Македонија едносменската настава е воведена во 150 училишта, а од Министерството за образование се задоволни како се одвива процесот. Оттаму велат дека и самите општини, односно градоначалниците, се вклучиле активно во спроведување на проектот и ја разбрале потребата и бенефитите од воведувањето на едносменската настава.
„Апелирам до сите градоначалници и сите директори да се посветат на овој проект, затоа што како што кажав бенефитот е мултифакторијален и ги опфаќа и учениците и родителите и наставниците. Нашата анализа вели за да се спроведе овој проект, едносменско работење во училиштата потребна е доградба на 300 училници и 70 санитарни јазли, што би чинело околу 8 милиони евра“. Тоа не може да се направи веднаш и ќе потрае”, изјави министерката за образование Весна Јаневска.
Градоначалникот на Ѓорче Петров, Александар Стојковски смета дека со едносменската настава им се олеснува образовниот процес и на децата и на родителите и на наставниците.
„На учениците, на децата им овозможуваме правилен биоритам на живеењето, да имаат доволно време за воншколски активности по завршувањето на редовниот дел од наставата“, изјави градоначалникот на општина Ѓорче Петров, Александар Стојковски.
Инаку министерката со градоначалникот Стојковски денеска ги посетија учениците во училиштето Димитар Поп Горгиев во Ѓорче Петров. Досега во училиштето се направени поголем број инвестиции, како поставувањето на енергетска фасада, девет училници добија нов под, а изградени се и два нови спортски терени, еден на вештачка трева и еден мултифункционален.
Љубиша Владимиров
