Еден загинат и четворица повредени се последиците од тешка сообраќајна несреќа што се случи синоќа околу 23 часот на булеварот „Борис Трајковски“ во Скопје.
Несреќата се случила при судир на две патнички возила со скопски регистарски таблички – „Фолксваген Голф“, управуван од 56-годишник, и „БМВ“, кое го возел 28-годишник, исто така од Скопје.
Возачот на „Голфот“ починал на местото на несреќата, додека тројца сопатници на загинатиот, како и возачот на „БМВ-то“, се здобиле со повреди. Повредените веднаш биле пренесени во Градската општа болница „Св. Наум Охридски“ и во Комплексот клиники „Мајка Тереза“, каде им била укажана медицинска помош.
