43-годишен маж е лишен од слобода по инцидентот на фудбалскиот терен Бело Брдо, во Штип, кога на утакмица помеѓу помлади пионери на фудбалските клубови Шкупи и Брегалница беа натепани дел од домашната екипа. Известен е јавен обвинител, а по расчистување на настанот ќе бидат поднесени соодветни мерки.
На игралиштето „Бело Брдо“ во Штип, за време на одигрување на фудбалски натпревар помеѓу младинските екипи на ФК „Брегалница“ од Штип и ФК „Шкупи“ од Скопје, А.А. (43) од Скопје, родител на фудбалер од ФК „Шкупи“, физички нападнал двајца малолетници од Штип, фудбалери на ФК „Брегалница“, и им нанел повреди. Веднаш по нападот, полициски службеници од СВР Штип го лишиле од слобода А.А., а малолетниците биле пренесени во Клиничка болница Штип за укажување помош.
Бесот ескалирал петнаесетина минути пред самиот крај на утакмицата. Играч на Шкупи, незадоволен од одлуката на судијата, удрил играч на Брегалница. Ситуацијата излегла од контрола откако на фудбалскиот терен влегле и родителите на гостинските играчи, раскажува за Алфа генералниот секретар на ФК „Брегалница“, Александар Иванов.
„При крај на натпреварот, играчот со број 9 од Шкупи доби црвен картон, по што настана препирка меѓу децата. Тој удри наше дете со бокс, при што влегоа родителите на Шкупи и ги нападнаа децата. Ние влеговме да ги браниме… Со какви повреди е детето? Мислам дека има скршеница на носот, изјави Александар Иванов, генерален секретар на ФК „Брегалница“ – Штип“
Во инцидентот повредени се две деца, информираат од штипската Клиничка болница, каде попладнево биле примени двајцата фудбалери. Нивната состојба е стабилна. Констатирани се телесни повреди и по укажаната лекарска помош се пуштени на домашно лекување, информираат од болницата.
