Министерот за економија и труд Бесар Дурмиши потпишал и ја објавил владината одлука за усогласување на минималната плата, за да се избегне блокада во исплатата на платите во државата.
Дурмиши изјави дека ја донел оваа одлука и ја објавил минималната плата, иако не постоела согласност од Економско-социјалниот совет, што е задолжително според законот.
„По одлука на Владата, јас, како министер за економија и труд, ја објавив минималната плата. Нема согласност од Економско-социјалниот совет бидејќи нема репрезентативност од синдикатите. Но, според Законот кој е во сила и кој е потпишан од синдикатите и работодавачите, обврзан сум по одлука на Владата да ја објавам минималната плата пред 31 март. Од неа се пресметуваат и просечната и другите плати. Ако не ја објавевме до 31 март, ќе се блокираше целата држава и сите институции, а приватниот сектор не би можел да пресмета плати за своите вработени“, рече Дурмиши.
На прашањето за протестот на членовите на Сојузот на синдикати на Македонија, Дурмиши истакна дека живееме во демократија и дека секој има право да изрази свој револт на улица.
„Минималната плата според постоечкиот Закон или методологија за која се усогласени сите страни изнесува 400 евра, што претставува зголемување на нето платата за 1.800 денари“, додаде тој.
Министерот објасни дека синдикатите веќе го имаат истечено мандатот и не се репрезентативни, и за тоа формирале комисија која треба да ја утврди нивната репрезентативност.
„Комисијата веќе работи. Кога ќе се утврди кој синдикат е репрезентативен, веднаш ќе ја свикам седницата на Економско-социјалниот совет. Точно таму синдикатите треба да ги изнесат своите барања, а не на улица“, заврши Дурмиши.
