Долги колони, автомобилски свирежи, метеж, и главоболки за возачите. Со години клучката кај Качанички пат кон Визбегово е место каде се случува сообраќаен хаос. Возачите кои редовно возат по овој пат, велат дека речиси е невозможно да се избегнат дупките, некои со големина на мали кратери, и да не ги оштетат гумите и амортизерите на автомобилите. Системот по кој што функционира овој фреквентен пат, е закрпи една дупка за да се појават три нови.
Собраќајниот хаос е најзабележителен во утринските часови, кога сите се обидуваат да стигнат на работа во индустриската зона Визбегово. Вистински предизвик за околу 20 илјади возачи на автомобили, околу две илајди камионџии, и 150-тина автобуси, колку што во просек, дневно, минуваат по овој пат. Проблем се и тесните свиоци, особено оние преку кои се приклучуваат од булеварот 8-ми септември на Качанички пат.
Ова е патот за Визбегово, место кое им задава маки на возачите одамна, асфалтот е оштетен полн со дупки, а возењето по него е вистински предизвик
Проектот за модерен кружен тек беше идеја на градоначалникот Коце Трајановски, а градежните работи започнаа кога татко на градот стана Петре Шилегов. Вкупната инвестиција на проектот беше во износ од 550 милиони денари и требаше да биде готова за само две и пол години, но од тогаш градежните работи се одвиваат бавно и без видлив напредок. А во мандатот на Арсовска, пак, четири години потоа речиси немаше никакво поместување.
Средствата за овој проект во 2021 година беа обезбедени со ребалансот на буџетот, а Шилегов уверуваше дека со тоа ќе се реши еден од најголемите сообраќајни проблеми на северниот влез во Скопје и ќе се создадат услови за понатамошен развој на градот. Но, четири години подоцна ништо од тоа. Празни ветувања, стопирани проекти и уништен пат кој секојдневно ги мачи возачите.