По налог на министерот Сашо Клековски, Инспекторатот ќе направи вонреден надзор во три здравствени установи – Општата болница во Струмица, Клиничката болница во Штип и Универзитетската клиника за неврологија во Скопје, каде што била третирана родилката.
„Во наредните денови се очекува Инспекторатот да ги комплетира надзорите и да ја прибере целокупната медицинска документација од трите здравствени установи. Врз основа на целосно утврдената фактичка состојба, ќе следат заклучоците од стручниот надзор и, доколку е потребно, понатамошни дејствија“, велат од Министерството.
Оттаму побараа јавноста да се воздржи од изнесување лични и медицински податоци за родилката и да се заштити нејзиното право на приватност, како и, заради коректност и заштита на достоинството на здравствените работници кои се вклучени во случајот.
Од институцијата велат дека нивната евентуална одговорност ќе биде утврдена единствено врз основа на резултатите од надзорот.