Поплавени дворови, куќи, амбари и ниви – ваква е сликата во општината Чешиново–Облешево по неколкудневните врнежи од дожд. Најалармантно е во селата Облешево, Спанчево, Чешиново и Чифлик. Излевањето на Кочанска Река речиси го поплави целото Кочанско Поле. Критично е и во домот на осумдесетгодишната Маре Атанасова од село Облешево, која утринава, поради надојдената вода, едвај успеа да излезе од својата куќа.
Опасноста од поплави се следи активно и се прават напори за заштита на домовите. Од раните утрински часови кризниот штаб на оваа мала општина е на терен. Со механизација се тампонираат дворовите полни со вода, а на терен е и Противпожарната единица на Кочани. Градоначалникот на Чешиново–Облешево побара помош од институциите за побрза санација на штетите и стабилизирање на состојбата.
Според мештаните, причината за поплавите, освен природата, ја гледаат и во неисчистените канали.
Од понеделник, градоначалникот Костадинов ги повика сите жители кои имаат штета да ја пријават во општината, по што комисија ќе излезе на терен за да изготви извештај за настанатата состојба.
