Според досега целосно обработените резултати од гласањето, во 11 општини градоначалниците се избрани уште во првиот круг од локалните избори. Најмногу победи забележа ВМРО-ДПМНЕ, чии кандидати триумфираа во осум општини, СДСМ во прв круг засега победи во една општина, исто како и НАИ и ВРЕДИ.
Победници од ВМРО ДПМНЕ се Славе Андонов во Василево (73,97%), Коста Маневски во Зелениково (57,19%), Ѓорѓе Божинов во Ново Село (58,86%), Александар Китански во Пехчево (52,47%), Спасе Кочовски во Вевчани (55,83%), Киро Нацков во Градско (71,92%), Никола Најдовски во Демир Хисар (53,91%) и Димитар Костадиноски во Јегуновце (58,32%).
Покрај нив, победа во прв круг остварија и Блаже Шапов од СДСМ во Богданци (50,03%), Даут Мемиши од ВРЕДИ во Теарце (54,60%) и Алија Јаоски од НАИ во Пласница (64,45%).
Во втор круг ќе се гласа во девет општини, каде ниту еден кандидат не освои над 50% од гласовите. Во Дојран ќе се соочат Илија Тентов од ВМРО-ДПМНЕ (48,52%) и Ристо Џинев од СДСМ (43,86%). Во Македонска Каменица во втор круг одат Димчо Атанасовски од ВМРО-ДПМНЕ (33,96%) и Соња Стаменкова од СДСМ (27,17%). Во Могила ќе се натпреваруваат Драганчо Саботковски од ВМРО-ДПМНЕ (49,17%) и независниот кандидат Сашо Пивковски (37,07%).
Во Ранковце во втор круг одат Даниел Павловски од ВМРО-ДПМНЕ (42,03%) и Даниел Крстевски од СДСМ (36,85%). Во Чешиново-Облешево ќе се соочат Јорданче Костадинов од ВМРО-ДПМНЕ (45,06%) и Горанчо Крстев од СДСМ (44,16%). Во Лозово во втор круг одат Ацо Велковски од СДСМ (46,07%) и Бошко Цветковски од ВМРО-ДПМНЕ (40,55%).
Во Росоман најмногу гласови освои Стојан Николов (45,63%), а зад него е Ѓорѓи Крстевски од ВМРО-ДПМНЕ (45,10%). Во Боговиње ќе се натпреваруваат Фети Абази од ВРЕДИ (48,83%) и Бесник Емши од НАИ (48,02%). Во Дебар во втор круг одат Фисник Мела од ВРЕДИ (40,08%) и независниот кандидат Рамадан Имери (31,45%).
Изборите ќе се повторуваат во три општини поради недоволна излезност, односно неисполнување на законскиот цензус од една третина од запишаните гласачи. Во Маврово и Ростуша излезноста изнесува 30,31%, а во трка за градоначалник се Онер Јакупоски од ВМРО-ДПМНЕ и Анес Ахмети од СДСМ. Во Врапчиште излезноста е 25,18%, а кандидати се Исен Шабани од НАИ и Мехмед Сефери од ВРЕДИ. Во Центар Жупа излезноста е најниска – 21,49%, а таму се натпреваруваат Аријан Ибраим од ДПТМ, Инает Баки од Партија за движење на Турците во Македонија и Алил Емрула од ДНЕТ.
