Дополнителен час на евтина дневна тарифа на струјата граѓаните нема да добијат до Нова Година – вели првиот човек на Регулаторната Комисија за енергетика, Марко Бислимовски. Цените на берзите во тој период биле најниски на светските берзи под 50 евра за мегаватчас, но проблемот биле превисоките цени навечер. Тоа значи дека за да се воведе евтина тарифа од пладне до 16 часот, ќе требало да се укинaт два часа од 22 часот до полноќи да остане евтината тарифа само во периодот од полноќ до 7 часот наутро. Со оглед на тоа што населението интензивно го користи овој период за вклучување на апаратите, ваквиот потег би наишол на револт кај граѓаните – велат од Регулаторна.
Ова не значело дека Регулаторната комисија се откажува од воведување на еден дополнителен час евтина дневна тарифа, но за тоа требало да се создадат услови – вели Бислимовски. Генерално, државните електрани и ЕВН Хоум биле за оваа мерка. Сепак, се очекувале зголемени цени на струјата на светските берзи од јануари, па ситуацијата дополнително ќе се следи за да не се наруши финансиската состојба на ЕСМ. Во меѓувреме, Регулаторната комисија за енергетика добила одговор од Европската енергетска заедница за превисоките цени на струјата во овој дел од Европа. Бислимовски се сомнева во образложението дека граѓаните од Балканот плаќаат повиски цени само поради зголемените температури и лошите интерконекторски врски со соседите.
До Регулаторна не стигнале многу поплаки околу стартот на грејната сезона во Скопје. На жалбите на граѓаните зошто во училиштата во скопски Карпош нема греење, тој вели дека тоа е одлука на самите потрошувачи. Со оглед на повисоките температури во овој период, Бислимовски не смета дека е проблем ако градоначалникот на Карпош одлучил грејната сезона да стартува од први ноември. Токму за училиштата и градинките во февруари годинава се намали цената за 35%, како и за дополнителни 20-ина проценти во јули. Инаку, цената на парното ќе остане стабилна до следното лето, освен ако не се случи драматична промена на цената кај природниот гас, вели Бислимовски.
