Од полноќ граѓаните ќе точат за 4,5 денари поевтин дизел. Литарот од 104,5 ќе поевтини на 100 денари, откако Владата ја продолжи мерката со која се намалува ДДВ-то од 18 на 10 проценти. Во исто време, бензините од полноќ поскапуваат минимално, за еден денар за литар. Еуросупер 95 ќе се продава за 100 денари, односно 102 денари за 98 октанскиот. Екстра лесното масло, пак, поевтинува за три денари и ќе чини 111,5 денари, додека мазутот ќе се продава за 49,88 денари за килограм. Од Регулаторната комисија за енергетика појаснуваат дека утврдените цени се максимални, што значи дека во наредната недела трговците можат да продаваат гориво и по пониски цени.
„Просечните цени на нафтените деривати се намалуваат за 1,06 проценти. Ова се максималните цени на нафтените деривати од 00:01 часот на 29.9.2026 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени“, велат од Регулаторната комисија за енергетика.
Намалената стапка на ДДВ-то е само една од мерките на Владата за амортизирање на ценовниот шок. Дополнително, намалени се и акцизите и тоа за четири денари кај дизелот и за два кај бензините. Од Владата појаснуваат дека во услови кога расте цената на нафтата на светските пазари, ваквите мерки треба дополнително да го ублажат ударот врз стопанството и да не предизвикаат сериозен удар по џебот на граѓаните.
„Продолжуваме со мерките за заштита на стандардот на граѓаните и стабилноста на домашната економија. Со продолжувањето на оваа мерка директно влијаеме врз малопродажните цени на горивата и го ограничуваме пренесувањето на надворешните ценовни притисоци врз цените на останатите производи и услуги“, изјави Гордана Димитриеска Кочоска.
По ваквиот развој Македонија и натаму останува со најевтини цени на горивата во регионот. Во земјава дневно се трошат до два милиони литри горива, од кои околу 1,5 милиони литри се трошат на дизел.
