Иако цените рипнаа буквално насекаде во регионот, но сепак и по поскапувањето, Македонија останува меѓу државите со најефтини горива. Гужвите кои вчера ги преплавија бензинските пумпи утрово спласнаа, на пумпите многу ретко може да се забележат коли, а повторно се точи и дизел. Од пазарниот инспекторат најавуваат засилени контроли кај бензинските, а досега се извршени над 300 инспекциски надзори во изминативе четири дена. Контролите покажале дека за сега не е констатирано криење на залихите на гориво.
„Увидено е дека 30-тина бензински станици ги истрошиле залихите, престанале со точење, има и неколку бензински каде што е продолжен инспекцискиот надзор, доколку има прекршувања на законот ќе имаат соодветни мерки согласно со закон.“– вели директорот на ДПИ Влатко Стојкоски.
Граѓаните се исплашени дека покачувањето на цените на нафтата ќе донесат и зголемување на цените на дугите основни потреби.
„Многу е. Тоа повлекува се, мислам дека после тоа ќе има и поскапување на храната. Реално и не се толку скапи цените во однос на другите држави“– велат граѓаните.
Од денес возачите во Македонија плаќаат 1,29 евра за бензин, а доколку возилата користат дизел цената е 1,39 евра за литар. Премиерот вели дека и по паскапувањето горивото кај нас е поефтино од било каде во регионот.
Ако се споредат цените, Македонија убедливо има најефтин дизел, а најприближна цена имаат Босна и Херцеговина каде дизелот чини 1,4 евра. Во Бугарија литар дизел чини 1,43 евра, додека во Србија достигнува 1,73 евра. Уште повисоки се цените во Грција каде дизелот чини 1,78 евра, а во Хрватска пак цената изнесува 1,72 евра. Во Словенија цените за дизелот се околу 1,53 евра, а Косово е приближно слично со 1,55 евра. Најскап дизел плаќаат возачите во Албанија каде цената изнесува скоро 2 евра.
Во однос на бензинот, Босна и Херцеговина се истакнува со најниска цена на литар бензин од 95 октани и чини 1,18 евра. Во Бугарија литар бензин чини 1,34 евра, а во Словенија цената е 1,45 евра. Нешто повисоки се цените во Хрватска каде цената достигнува 1,51 евра, а во Србија бензинот чини 1,52 евра. Убедливо највисоки цени за бензин плаќаат во Грција каде чини 1,81 евра.
Во поголемиот дел од европските држави цените се значително повисоки. Најскап бензин во моментов има Италија каде што цените достигнуваат 1,87 евра, а дизелот достигнува 2 евра.
