Дизел горивата поевтинуваат за 1,5 денари, а цените на бензините остануваат исти. Одлуката за намалување на малопродажните цени на нафтените деривати беше донесена денеска од страна на Регулаторната комисија за енергетика, водни услуги и услуги за управување со комунален отпад (РКЕ). Со оваа одлука се остварува просечно намалување на цените за 1,29% во однос на претходната пресметка.
Според новите цени, малопродажната цена на ЕУРОДИЗЕЛ БС (Д-Е V) изнесува 68,5 денари за литар, додека цената на Екстра лесното масло за домаќинство (ЕЛ-1) е 68 денари за литар. ЕУРОСУПЕР БС – 95 ќе остане на цена од 74,5 денари за литар, а ЕУРОСУПЕР БС – 98 ќе се продава за 76,5 денари.
Исто така, со одлуката на РКЕ, малопродажната цена на Мазутот М-1 НС се намалува за 0,916 денари и сега изнесува 41,345 денари за килограм.
РКЕ исто така наведува дека на светскиот пазар, референтните цени на нафтените деривати во споредба со претходната пресметка се зголемени за 2,592% кај бензините и 0,172% кај мазутот, додека за дизелот има намалување од 1,513%, а за екстра лесното масло намалувањето е 1,550%. Курсот на денарот во однос на доларот е понизок за 2,5506% во однос на претходната пресметка.
