Македонија може да извлече корист од големата неизвесност што е присутна на меѓународните пазари и во глобалната економија, порача од Вашингтон министерката за финансии, Гордана Димитриеска-Кочоска. Таа престојува во Вашингтон, каде што учествува на пролетните средби на ММФ и Светска банка.
Министерката очекува дека проектираниот раст на економијата на земјава од 3,7% е реално сценарио.
„Оваа криза, која носи голема неизвесност, ние како држава можеме многу да ја искористиме – во смисла на префрлање на капацитетите од европските земји. Односно, капацитетите во европските земји ќе се затвораат и понатаму, затоа што царините значат повисоки набавни цени, и на тој начин европскиот пазар ќе бара алтернативи за отворање капацитети онаму каде што ќе имаат, на некој начин, поевтина работна сила. Иако во земјава веќе не е евтина работната сила, сепак е на пониско ниво од европската. Оттука мислам дека проекцијата од 3,7% е реална проекција,“ рече министерката за финансии.
Таа потенцира дека она на што Владата е посветена, а што го бара и ММФ, е фискална консолидација, но додаде дека работите не можат да се сменат преку ноќ и дека ќе биде потребно уште време.
Министерката за финансии до 26-ти овој месец ќе учествува на пролетните средби на групацијата на ММФ и Светска банка, каде што ќе оствари средби со високи претставници на овие две меѓународни финансиски институции, како и со претставници на Tрезорот на САД.
