Со првиот македонски долгометражен анимиран филм Јон Вардар против Галаксијата ќе биде отворено 9 издание на меѓународниот филмски фестивал Киненова. На овогодинешното издание специјален гостин е познатиот австрискиот режисер и продуцент Улрих Зајдл, за многумина контоверзен автор, и веројатно единствениот што направил проекција на неизмонтиран филм. За престојот во Скопје, Зајдл вели дека ќе го искористи за да се запознае од блиску со македонската кинематографија, но истовремено даде краток опус на неговото творештво.
,,Моите филмски примери, т.е. моите т.н. филмски татковци, кои со својот светоглед и со својата уметничка програматика ми беа патоказ и кои ми ја поттикнуваа креативноста додека учев да станам режисер, ги имам споменато во стотици интервјуа. Создавањето на филмови, вклучително и документарните е процес кој од режисерот бара да има целосна контрола врз развојот на филмот исто како и во останатите филмови со сите контраверзии, експлицитни, морални и етички содржини,, истакна Зајдл.
За време на фестивалот ќе бидат прикажани проекции од домашни и странски автори од Финска, Австрија, Израел, Словенија, Хрватска, Полска и др. Оваа година за прв пат покрај проекцијата на филмови ќе биде одржана и работилница за развој на идеи и сценарија за кратки филмови кои се инспирирани од реални случувања и вистински ликови. Работилницата ќе биде водена од истакнатата сценаристика и драматург Ерин Демирцаки од Грција.
Даниел Ѓорѓевски
