Дипломати од Велика Британија, Франција, Германија, Украина и САД денеска во Лондон ќе одржат нова рунда разговори со цел постигнување прекин на огнот во тригодишната војна меѓу Украина и Русија. На преговорите во Лондон се очекуваше да присуствуваат специјалниот пратеник на американскиот претседател, Стив Виткоф, и државниот секретар Марко Рубио, но тие се повлекоа. Наместо нив, беше испратен американскиот претставник за Украина, Кит Келог, јавува Би-Би-Си.
Рубио синоќа во разговор со британскиот министер за надворешни работи, Дејвид Лами, изјави дека се надева на суштински добри технички состаноци. Белата куќа објави дека Виткоф оваа недела ќе отпатува за Москва на четвртата средба со рускиот претседател Владимир Путин. Овие преговори доаѓаат по извештајот на британскиот „Фајненшл Тајмс“, според кој Русија би можела да биде подготвена да ја запре војната долж сегашните линии на фронтот и да се откаже од некои територијални амбиции во замена за американското признавање на рускиот суверенитет над Крим, пренесува Танјуг.
Украинскиот претседател Володимир Зеленски изјави дека не му биле дадени такви предлози и дека ја отфрлил можноста Крим да се признае како руска територија.
