Делегација од шест македонски општини, која престојува во студиска посета на Хрватска, го посети Културно-информативниот центар (КИЦ) во Загреб, при што во фокусот на разговорите беа можностите за продлабочување на соработката, особено во делот на заедничка културна промоција и унапредување на туристичките потенцијали на локалните самоуправи.
Во состав на делегацијата, која остварила средба со директорката Мими Ѓоргоска-Илиевска, биле градоначалниците на Битола, Кичево, Новаци и Демир Капија – Тони Коњановски, Александар Јовановски, Стевче Стевановски и Наталија Димитриева, како и секретарите на општините Куманово и Вевчани, Емилија Сларидис-Јаневска и Зоран Радиноски. Во посетата учествувал и координаторот за енергетски проекти во организацијата „Екосвест“, Жарко Конески.
Како што информираат од КИЦ Загреб, на средбата биле разгледани можности за продлабочување на соработката меѓу македонските општини и КИЦ во Загреб, при што акцентот бил ставен на промоцијата на локалните самоуправи како туристички дестинации.
– Во таа насока беа разгледани повеќе иницијативи и можности за заедничко организирање културни настани, изложби, презентации и други активности преку кои ќе се афирмираат културните и туристичките потенцијали на македонските општини пред хрватската јавност – стои во соопштението од КИЦ.
Соговорниците разгледале и конкретни иницијативи за заедничка организација на културни настани, изложби, презентации и други активности, кои ќе придонесат за афирмација на културните и туристичките потенцијали на македонските општини.
