Градоначалникот на Општина Делчево, Иван Гоцевски, заедно со делегација составена од претседателот на Советот, Николчо Стојменовски, директорот на Националната установа Центар за култура „Никола Јонков – Вапцаров“, Златко Начовски, и командирот на ТППЕ Делчево, Сашко Поповски, престојува во официјална посета на Општина Чрномељ во Словенија, каде се разгледуваат можностите за продлабочување на меѓуопштинската соработка.
Како што информираат од Општина Делчево, посетата претставува значаен чекор во зацврстувањето на пријателските односи меѓу двете општини, кои и покрај географската оддалеченост од околу 1.000 километри, успешно градат партнерство базирано на заеднички вредности и визија за развој.
Градоначалникот Гоцевски истакна дека посетата претставува посебна чест и можност делегацијата одблиску да се запознае со функционирањето на Општина Чрномељ и нејзиниот успешен пристап во искористување на европските фондови, развојот на инфраструктурата и поддршката на малите и средни претпријатија.
– Особено сме благодарни за досегашната поддршка од Општина Чрномељ, особено во делот на опремување на Територијалната противпожарна единица и едукацијата на младите од Делчево преку летните кампови за справување со кризни ситуации, изјави Гоцевски.
Во рамки на посетата, остварена е средба со градоначалникот на Чрномељ, Андреј Кавшек, при што била договорена натамошна соработка во повеќе области, меѓу кои локалниот економски развој, културата, образованието, туризмот и младинските политики.
Од Општина Делчево нагласуваат дека поврзувањето на потенцијалите на двете општини може да донесе конкретни придобивки за граѓаните, отворајќи нови можности за инвестиции и меѓународна соработка.
Делчево, како општина лоцирана во источниот дел на државата, располага со значајни природни ресурси и потенцијал за развој на рурален и еко-туризам, додека Чрномељ се издвојува со своето искуство во прекуграничната соработка, културата и туризмот.
Соработката меѓу двете општини се посочува како позитивен пример дека јасната визија за заеднички развој може да ги надмине географските бариери и да создаде цврсти партнерства во интерес на граѓаните.
