Во Делчево е уреден уникатен парк со цитати од Светото писмо, во кои се споменува Македонија, а кој веќе привлекува внимание кај посетителите и прераснува во нова туристичка и духовна атракција во градот.
Паркот е лоциран пред соборниот храм „Св. Кирил и Методиј“, а во него се поставени 27 мермерни плочи, од кои на 26 се испишани библиски цитати и стихови во кои директно се споменува Македонија.
Според градоначалникот Иван Гоцевски, паркот претставува симболичен спој на верата, историјата и македонскиот идентитет.
– Делчево доби уникатен парк, кој има духовно, културно и едукативно значење. Овој простор сведочи за историското присуство на Македонија во библиските текстови и ја истакнува поврзаноста на македонската традиција со христијанското наследство – изјави Гоцевски.
Цитатите на мермерните плочи се поврзани со мисионерските патувања на апостолот Павле и неговото дејствување на македонска почва, меѓу кои е и познатото Македонско видение.
Од Општина Делчево посочуваат дека паркот има повеќеслојно значење – духовно, културно и едукативно, но и потенцијал за развој на верски и културен туризам.
Со својата уреденост, симболика и пораки, паркот претставува место за духовен мир и почит кон пишаниот збор, а мермерните плочи остануваат трајно сведоштво за поврзаноста на Македонија со библиското наследство. Паркот е инвестиција на Општина Делчево.
