🎥 „Два потписа за кандидатура не се проблем за Ѓорѓевски, Шукова стравува од метеж на гласањето“

Независните кандидати за градоночалници не се закана за поголемите партии. По одлуката на ДИК, со која – секој што сака, само со две лични карти може да стане кандидат за градоначалник се појавија бројни сомнежи во јавноста дека гласачките ливчиња ќе наликуваат на тетратки, ќе има километарски ливчиња за советници но и голем избор на кандидати за градоначалници.

Дел од кандидатите во ова не гледаат проблем. Според Орце Ѓорѓиевски, Македонија е демократска држава и секој има право да се кандидира доколку смета дека може да добие мандат од граѓаните да води оштина, или да биде советник.

Кандидатката за градоначланик на град Скопје од СДСМ, Каја Шукова не ја исклучува можноста да настане метеж со независните кандидати на денот на изборите, според неа тој прецес треба законски да биде регулиран.

Според кандидатот за градоначалник на општина Чаир, Изет Меџити несерозните  кандидати доколку ги има такви кои ќе се пријават за локалните избори веднаш ќе бидат препознаени од граѓаните и ќе излезат од игра уште во првиот круг.

Новите правила на игра доаѓаат откако уставниот суд во мај годинава укина две одредби Изборниот законик, кои го одредуваа бројот на потписи што треба да се соберат за независни листи. Тогаш прагот беше 1% и наиде на критики од граѓанските инцијативи, а по неговото укинување остана нерегулирано прашањето колку потписи тие треба да соберат за да поднесат листи на кандидати за членови на Совет, односно за градоначалник.

Викендов пратениците се обидоа да го регулираат ова преку измени во Изборниот законик – но ДУИ ги минираше обидите бидејќи гласаше против, со што не беше исполнет условот за Бадентер. Предлогот на владејачкото мнозинство беше прагот да биде 0,95% од бројот на избирачи во дадената општина, а преку амандмани тој праг се намали на 0,5% – сепак измените не поминаа.