Купиштата ѓубре во Скопје кои со денови се трупаат на улиците на главниот град се идеално „гнездо“ за размножување на глодарите. Глувците и стаорците се познати преносители на сериозни заразни болести, предупредуваат епидемиолозите.
„Стаорците се размножуваат според експоненцијална прогресија: во период од само 18 месеци еден пар може да даде повеќе од еден милион потомци. Тоа е биолошки факт. Експоненцијалниот модел претпоставува неограничени ресурси како храна, вода и простор. Таа претпоставка во Скопје е исполнета! Прашањето што се поставува е колку ли се накотени досега, кога условите се оптимални, а сметот се натрупува со месеци?“, прашува епидемиологот Драган Даниловски.
Скопје со денови е затрупано во ѓубре, поради неисчистените контејнери, поради што се претвора во темпирана бомба за епидемија. Микробиолозите предупредуваат дека ситуацијата е алармантна.
Според Центарот за контрола на болести, и стаорците и глувците се одговорни за пренесување на преку 35 болести ширум светот. Епидемиолозите укажуваат дека е потребна најитна, координирана интервенција на сите надлежни институции – по потреба и со прогласување вонредна состојба на делови од територијата на градот, првенствено заради дезинфекција, дезинсекција, дератизација и отстранување на ризикот по јавното здравје.
„Откако опасноста ќе се неутрализира, мора да следи и јасна институционална одговорност. Зашто, правото на здравје е уставно загарантирано право на секој граѓанин“, вели Даниловски.
Проблемот со нехигиената во градот ескалираше во екот на локалните избори во Македонија, кога меѓу другото се бира и наследникот на градоначалничката која сè уште е на функција – Данела Арсовска. Нејзиниот наследник наредниот период ќе треба да се фрли во костец со најгорливите проблеми во градот Скопје – а меѓу нив е и ѓубрето.
Основното јавно обвинителство Скопје веќе постапува и презема дејствија за обезбедување докази за евентуално кривично дело во врска со состојбата со отпадот во Скопје.
