Срцеви заболувања, тешки проблеми со белите дробови, астма, хроничен бронхитис, па дури и канцер – ова не се далечни закани, туку најчестите последици од пушењето цигари предупредуваат лекарите.Најавениот нов закон против пушење ако се имплемнтира до крај ќе даде добри резултати оценува лекарската фела. Според директорот на Институтот за белодробни заболувања и туберкулоза со ограничување на пасивното пушење, значително ќе се намали ризикот од скриени, но сериозни здравствени последици, што долгорочно ќе придонесе за поздрава нација.
“Цигарите оштетуваат од коса до пети, сите системи ги оштетуваат, тие помалку што пушат помалку се изложени на штетна дејност од цигатрите, тие повеќе што пушат повеќе се изложени на штетни дејности но имаат поголем ризик за болести.Секое намалување на цигари е добредојдено, на било кое јавно место дали во училишта, болници, ресторани кафани…секаде е добредојдено” – вели директорот на Институтот за белодробни заболувања и туберкулоза д-р Димитар Каркински.
Секој запалена цигара кај еден адолесцент е чекор поблиску до хронична болест и пократок живот, предупредуваат лекарите.
„Адолесцентите ги користат цигарите и за слабеење, затоа што пушењето го намалува апетитот, а тоа е крајно погрешно. Голем проблем е што децата почнуваат да пушат поради мода. Колку помалку гледаат дека пушат нивните другарчиња, толку помалку и тие ќе го прават тоа“, вели пулмологот Каркински.
Лекарите предупредуваат дека најзагрижувачко е тоа што зависноста од никотин се развива многу побрзо кај младите отколку кај возрасните.
Речиси половина од населението во државата е зависно од цигари, со просечна потрошувачка од 18 до 22 цигари дневно, што е двојно повеќе од европските стандарди…
Со новиот закон пушењето ќе биде забрането пред здравствени установи, училишта, градинки, министерства..и други јавни институции. Освен забраните законот предвидува и високи казни за оние што нема да го почитуваат. 300 евра за физички и од 2000 до 5000 евра за правни лица.
