Централниот совет на Македонците во Германија со седиште во Берлин поднесе формална жалба до претседателката на Европската комисија, г-ѓа Урсула фон дер Лајен, поради тешки повреди на основните договори на Европската Унија во рамките на преговорите за пристапување на Македонија.
Централниот совет на Македонците во Германија е регистрирано здружение според германското право со седиште во Берлин, кое ги претставува и застапува граѓанките и граѓаните со македонско потекло кои живеат во Германија. Жалбата се однесува на идентитетско-политичките барања на земјата-членка Бугарија, кои не се засноваат на правото на ЕУ, туку на билатерални национални интереси кои се во спротивност со духот на примарното право на Унијата. Конкретно, овие барања се содржани во Протоколот од втората заедничка владина седница меѓу Бугарија и Република Македонија од 17 јули 2022 година, кој преку упатувања е вграден во преговарачката рамка за пристапување. Затоа бараат бришење на упатувањата кон Протоколот од 17 јули 2022 година во преговарачката рамка, одлука на Европскиот совет со која изрично се утврдува дека прашањата на националниот јазик, идентитет и историја не се составен дел на пристапните преговори и покренување постапка против Бугарија, односно постапка за повреда на договорите.
