Илјадници пакети и пратки, од денес ќе бидат детално проверувани преку новиот рентген поставен во Царинската испостава во Пошта. Од играчка порачана преку интернет, па се до опасен товар што криминалците и терористички групи ќе сакаат незабележано да го протнат. Низ скенерот ќе минуваат стотици пратки во минута, а со помош на вештачка интелегенција операторите ќе добиваат сигнал за секаква сомнителна пратка. На овој начин ќе се спречи трговијата со огнено оружје, муниција, дрога и експлозиви низ Западен Балкан.
„Во време на рапиден пораст на е-трговијата, високата количина на пратки претставува потенцијална опасност за користење на поштенските пратки за дистрибуција на недозволени стоки како што се дроги, експлозиви и оружје. Оттука, спречувањето на користењето на е-трговијата како канал за дистрибуција од страна на криминалците е од исклучителна важност за ефикасно справување со безбедносни закани“, изјави Бобан Николовски – директорот на Царинска управа.
Царинските службеници и вработените во Пошта со новата машина ќе можат да разликуваат органска материја, од метал и пластика, да препознаваат потенцијални делови од огнено оружје, муниција или експлозив, па дури и кога се сокриени во двојно дно или во густи пакувања со други производи.
„Важно е колку е истренирано окото на оној кој ја гледа сликата. Можеби обичен набљудувач нема да забележи разлика помеѓу овие боци, но трниран оператор ќе види дека бојата е различна, доколку едното е обележано со органска, а другото со неорганска, а ја имаат залепено истата налепница“, изјави Киро Цветков – програмски офицер во канцеларијата на ОН за дрога и криминал.
За директорот на Македонска пошта Орхан Куртиши, скенерот е од исклучително значење за поштенското работење.
„Живееме во време во кое секојдневно се соочуваме со сериозни закани предизвикани од криминални мрежи вклучени во трговија со забранети супстанци, оружје и дрога. Од тие причини, оваа донација е од голема важност за нивно непречено откривање материи и предмети, до пратки“, изјави Орхан Куртиши, директор на Македонска пошта.
Рентген платформата е произведена од американската компанија „Астрофизикс“, а во рамки на проектот „Хермес 2“ веќе се спроведуваат и обуки за операторите што ќе работат со новиот уред, но и активности за подобрување на соработката меѓу Царината, МВР и Јавното обвинителство. Онлајн купувањето по пандемијата постојано расте, а со тоа и обидите криминалните групи да внесат забранети материи преку поштенски пратки. Новиот скенер, како и донираната опрема, се обезбедени со поддршка од Германија, Шведска, Холандија, Франција, Обединетото Кралство и Норвешка преку Канцеларијата на Обединетите нации за дрога и криминал.
