Враќање на интегритетот на Антикорупциската комисија, транспарентност и поголема доверба во институциите – но и поправка на оценките што Македонија ги добива од Брисел. Вака ги постави приоритетите новоизбраниот претседател на Државната комисија за спречување на корупцијата, Адем Чучуљ, кој денеска и официјално ја презеде функцијата со свечена заклетва во Собранието.
„Ќе се залагам за дигитализација, за превентивните алатки. Во фаза сме на подготовка на новата Национална стратегија, која се изготвува во инклузивен процес, со учество на сите релевантни фактори во државата. Како превентивна алатка се надевам дека ќе биде многу поконцизна и поспроведлива за разлика од претходната. Со тој механизам ќе придонесеме да се отстранат системските слабости кои генерираат корупција. Исто така напоменав дека во фокусот како претседател, се надевам ќе имам поддршка од целата Комисија, да ја зголемиме нашата проактивност во делот проверка на имотната состојба на избраните и именуваните лица бидејќи тоа е една од забелешките во Извештајот на ЕК, а е шеста препорака на ГРЕКО“, изјави Адем Чучуљ, претседател на Антикорупциска комисија.
Националната стратегија за спречување на корупцијата и судирот на интереси 2026-2030 која треба да ги детектира слабостите и да понуди алатки за нивно надминување е во завршна фаза, објасни Чучуљ на меѓународниот ден за борба против корупцијата.
За познавачите на ова поле, позитивен сигнал е дигитализацијата, но предупредуваат дека системските ризици од корупција и понатаму сериозно ја оптоваруваат државата. Трагедијата во дискотеката „Пулс“ во Кочани, во која загинаа 63 млади, ја отвори болната тема за нефункционалните институционални контроли и последиците од нив.
„Мислам дека заслужува земјата многу поодлучна борба и инвестиција во борбата против корупција и на страната на инспекциските служби и на превентивните органи како ДКСКО, и на репресивните органи како полицијата и правосудството. Во сите тие потребно е да видиме многу повеќе инвестиција, но и истовремено работа, одговор и резултати од тие институции“, изјави Миша Поповиќ, Институт за демократија.
Адем Чучуљ е дел од Антикорупциската од 2006 година – почнал како записничар, а минатата година беше именуван за генерален секретар. Сега е избран едногласно, со 82 гласа во парламентот, во момент кога институцијата се обидува да ја врати нарушената доверба и да одговори на засилениот јавен притисок. Потребата за нов претседател среде мандат се отвори по оставката на Татјана Димитровска, која летово се повлече поради обвиненија за оддавање службена тајна во корупциски предмет и измама при добивање сертификат за класифицирани информации.
