Четириесетина планинари од разни делови на државата се дел од денешната Бошавска јужна трансверзала 2026 година, што по петти пат се реализира на Кожуф планина, во организација на Дарко Најдов, здружението „К3“ и планинарскиот клуб „Зелен брег“.
– По врвиците на славното минато, некои од планинарите за првпат ќе ги запознаат прекрасните убавини што Кожуф планина ни ги дарува бесплатно. Тргнавме со организиран превоз од Кавадарци, преку Гевгелија до месноста „Шутка“ над „Смрдлива вода“. Таму беше стартот на Бошавската јужна трансверзала, што воедно е една од ретките трансверзали на ниво на Македонија – појасни Најдов.
Од „Шутка“, се искачуваат врвовите К92, Зелен брег и Порта.
– Планинарејќи 31 километар, планинарите ќе пристигнат во кавадаречкото село Горна Бошава, каде ги очекува организиран ручек – планинарско гравче, врачување на благодарници, награди и дружење – додаде младиот и искусен планинар Најдов.
