Состојбата во општина Чешиново-Облешево е стабилна, ваква е оценката на Кризниот штаб по утринскиот состанок. Наставата во училиштето се одвива непречено, а со помош на Црвениот крст до населението се дистрибуира чиста вода за пиење. Надлежните очекуваат, најдоцна до утре, во корито на Кочанска Река да влезе тешка механизација на Бехтел и Енка, за да започне неговото чистење.
„Наставата во училиштето се одвива во нормални услови. На кризниот штаб присуствуваа претставници на Центарот за јавно здравје. Тие како институција да направат дезинфекција на територијата која беше зафатена од поплавите. Веднаш што ќе се создадат услови, ќе се направи дезинфекција на поплавените објекти и земјиште“, изјави Јорданчо Костадинов, градоначалник на Чешиново-Облешево.
Од денеска жителите ќе можат да ги пријавуваат настанатите штети од поплавите. Досега се пристигнати над десеттина барања за обештетување.
„Дополнително, комисијата ќе ги сондира тие барања, по што ќе излезе на терен за да ја увиди фактичката состојба“, изјави Јорданчо Костадинов, градоначалник на Чешиново-Облешево.
Дождовите, но и поплавата, сериозно ги погодија земјоделците во Чешиново-Облешево. Според првичните проценки, околу 30% од оризовите површини останаа неожнеани, а штети има и кај житните култури.