Бугарите молат во Брисел. Се јавувале да се одложи гласањето за македонскиот јазик и идентитет. Премиерот Христијан Мицкоски вели дека власта во Софија се обидува на сметка на Македонија да го смени левот со еврото. Се јавувале да молат да не се расправа и гласа за извештајот, со кој во Европскиот Парламент треба да се зацементира македонскиот јазик и идентитет. На бугарските власти им е страв дека протестите против воведување на еврото ќе се прошират и ескалираат, ако помине извештајот за македонскиот јазик и идентитет.
-И тогаш високи политичари од страна на нашиот источен сосед вртеа на високи политичари во Брисел, аман те заман не го ставајте сега извештајот, не ни правете проблем бидејќи нели треба да помине еврото во Парламентот, да не ни се соберат повеќе луѓе на улица, да ни протестираат знаете сега имаме еден голем проблем и во ред, најголемиот дел од европратениците, оние кои што вистински ги застапуваат европските вредности одлучија да му дадат шанса на процесот, изјави Мицкоски.
Расправата за извештајот за напредокот на Македонија требаше да биде на четврти јуни, но известувачот Вајц побара да се одложи за 20 дена, за Бугарија да има шанса да ги каже своите аргументи. Според Мицкоски доколку не се изгласа овој документ, само ќе се докаже дека на официјална Софија уставните измени не и се единствена цел.
-Ако не помине, ако повторно се одложи, тогаш треба македонските граѓани да се свесни дека не е неколку стотици македонски граѓани кои што се дел од бугарската заедница кај нас да бидат дел од нашата Преамбула, туку македонскиот посебен вековен идентитет и јазик. Тоа е суштината, тоа е проблемот, се останато нема никаква врска со реалноста и нема никаква врска со она што ни го кажуваа политичарите во минатото. Или се политички аналфабети или брутално и грубо ги лажат граѓаните, изјави Мицкоски.
Расправата по извештајот, каде за прв пат се користат термините македонскиот јазик и идентитет, е закажана на 24 јуни во Европскиот Парламент. Овој извештај се смета за победа на Македонија, која започна дипломатската офанзива за да ја увери Европа дека бугарските барања немаат ништо врска со европски принципи, туку со негирање на македонскиот идентитет и јазик.
Матеја Петровски
